Իրավունք սովորեցնողը իրավունք է խախտում

Օլեգը, որ մեր դպրոցում իրավունքի մասին սեմինարներ է անցկացնում երեխաների համար, հենց ինքն էլ խախտում է աշակերտների իրավունքները:

Մեր դպրոցում բազմաթիվ սեմինարներ են անց կացվում առողջության, իրավունքի, ներառական կրթության, բնապահպանական և այլ թեմաներով: Շատ անգամներ սեմինարներ է վարել Օլեգը, ով մեզ իրավունք է սովորեցնում:

Մայիսի 27-ին քննական պարապմունքների ամենաթեժ շրջանում, Օլեգը որոշեց սեմինար անցկացնել առողջապահության թեմայով:

Դրա նախորդ օրը երեկոյան աշակերտական խորհրդի նախագահը զանգահարեց և ասաց, որ հաջորդ օրը սեմինար է լինելու, բայց շատ մանրամասներ պարզ չէի: Մտածեցի` կմասնակցեմ, և երբ կգա պարապմունքի ժամը, թույլտվություն կխնդրեմ ու կգնամ:

Ուզում եմ նշել, որ օրենքով սահմանված կարգով ես սեմինարի մասին պիտի իմանայի 3 օր առաջ` բոլոր մանրամասնություններով:

Առավոտյան դպրոցում Օլեգը հայտնեց, որ սեմինարը եռօրյա է, օրական 2.5-3 ժամ: Ես հայտնեցի, որ 1.5 ժամից պարապմունք ունեմ, իսկ նա ոչինչ չասաց:

Եկավ պարապմունքիս ժամը, և ես թույլատվություն խնդրեցի, իսկ նա մերժեց:

-Եթե գնաս` տնօրենից նկատողություն կստանա: Այդ հարցով էլ ինձ չդիմես, չես գնալու,- ասաց նա:

Ճիշտ է, առողջությունը կարևոր է, բայց այդ պահին իմ քննություններն ավելի կարևոր էին, վերջիվերջո, դրանցով ամփոփվում են վերջին 5 տարվա ստացած գիտելիքները:

Օլեգը էլի չթողեց, և ես ստիպված եղա առանց երկար-բարակ բացատրելու դուրս գալ դասասենյակից և գնալ իմ պարապմունքին:

Իմ գնալուց հետո նա  սպառնացել է, որ իմ նման «անմակարդակին» դպրոցից հեռացնել կտա` սրանով խախտելով իմ ժամանակը ազատ տնօրինելու և արժանապատվության իրավունքները:

Ճիշտ է, ես իմ նպատակին հասա, սակայն ներքուստ բարկացած էի: Ախր, ինչո՞ւ է կյանքն այդքան անարդար: Իրենք իրավունք են սովորեցնում, իրենք էլ խախտում, իսկ մենք պիտի լռե՞նք:

Դե  հերիք  է աչքներիս թոզ փչես: Զզվել եմ անարդարությունից, դուք մենակ փող սարքեք, իսկ ա՞նձը, հոգի՞ն, ներաշխա՞րհը:

Ես կպարապեմ, քննություններս լավ կտամ, դպրոցը կավարտեմ ու լավ մասնագետ կդառնամ:

Եթե տարիներ հետո դու իմ օգնության կարիքը զգաս… ես քեզ կօգնեմ առանց տատանվելու, հենց այդպես էլ վրեժս քեզնից կլուծեմ: